निनाद

आवाज होतंय
आत आवाज होतंय
माझी मांजरं माझ्याशी बोलतात
तसलं काहीतरी
शब्द नेमके कळत नाहीये
पण स्वर कळत आहे
त्रस्त
त्रस्त
कोणालातरी सांगायला हवंय
पण सांगण्यासाठी शब्द कोठे माझ्यापाशी?
रौद्र स्वरात आवाज करू?
त्यांनातरी काय कळणार?
त्यांना ऐकायचं तरी असेल का?
नको
नकोना
झाडाच्या एकांतात का त्याची पानं पडतात?
हिवाळा नसतो, वारा नसतो
तरी त्याची पानं पडतात
त्यानेच पाडली असावीत,
नाही का?
झाड रडत ही न्हवता ना
पानांनी मग घेतलं असावा
झाडाचा निनाद त्यांच्या अंगात
म्हणून स्वतःहून फाडून घेतलं असावा
त्याच्या फांदीवरून
त्याच्या अंगावरून
स्वतःला
पानांना दुखलं असेल का?
आणि
ज्या मातीवर ती पानं पडली
त्या मातीने तरी ऐकलं असेल का?!
- 

०८-०३-२०